Lamp. Francisco Lucensi.

Vides lector studiosisime quanto cum labore que sparsim sanctorum exempla scripta sunt paruo collegerit volumine noster Marulus quanta cum gratia illa digesserit: ut per ea religiose viuendi normam diuini eloquij autoritate interposita confirmaret. Processere huiusmodi instituta a recte instituto animo: vt qui prius se perfectum exhibuerit, quam perfectionis institutiones descripserit. Qui virum agnoscunt, haud aliter esse testantur. Proinde si tibi que legis vsui et emolumento futura esse desyderas: illum imitare qui ita viuit vt docet, Christi redemptoris nostri sectator facere incipientis et docere. Pro tali tantaque lucubratione quantum debeas agnosce: neque vero alias te sibi gratias persolui optat, nisi vt quoad eius potes integrum te ab omni peccatorum labe immaculatum serues.

Operis imprimendi curam suscepit Venerandus Sacerdos Franciscus lucensis: qui vt est in rebus agendis accuratissimus, vt in lucem castigatissimus prodiret liber, non laboribus, non vigilijs, non etiam impense pepercit: cum archetypo ipsius Maruli impressum contulit volumen: et que in eo errata reperit diligenter annotauit, citatis quaternionibus et linearum numero vt facilius ea corrigi possint. Tuum erit meminisse hominis cuius beneficio lectione suauissima simul et sanctissima oblectaberis.

Vale.

Laboraui non parum Lector candide, vt hosce Maruli libros meis typis procuderem quam emendatissimos. Sed quis ille Argus impressor, quem obiter labecule quepiam non subterfugiant? Id quum et mihi nuper euenisse relegens perspicerem, quamprimum enotandis omnibus, que ab Archetypo deerrauerant, sedulam accommodaui operam: atque (Quecunque illa) codici appendimus: vt, quo saltem potuimus modo, nihil in hoc opere desiderares.

Vale.